Санаи 30-юми июли соли 2024 дар Бозиҳои тобистонаи олимпии Париж-2024 аз риштаи ҷудо Сомон Маҳмадбеков дар вазни -81 кг соҳиби медали биринҷӣ гардид, хабар медиҳад АМИТ «Ховар».

Сомон дар даври аввал озод буда, дар марҳилаи дуюм бар Фарес Бадавии фаластинӣ ва дар рақобати баъдӣ бар Франк Де Вит аз Нидерланд пирӯз шуд.

Дар даври ¼-ниҳоӣ варзишгари тоҷик бо Тато Григалашвили аз Гурҷистон гӯштин гирифта, аз ӯ шикаст хӯрд ва ба марҳилаи тасаллобахш рафт.

Дар марҳилаи тасаллобахш Сомон бар варзишгари Узбекистон Шарофиддин Болтабоев ғолиб омад.

Варзишгари тоҷик дар рақобат барои медали биринҷӣ бар ҷудочӣ аз Италия Антонио Эспозито ғолиб омада, сазовори ҷойи сеюм ва медали биринҷӣ гардид.

Ин нахустин медали дастаи олимпии Тоҷикистон дар Бозиҳои тобистонаи олимпии Париж-2024 аст. Бо ба даст овардани медали биринҷӣ Сомон Маҳмадбеков тавонист баъд аз 16 сол аз риштаи ҷудо барои Тоҷикистон медали олимпиадаро соҳиб шавад. Қаблан, соли 2008 дар Бозиҳои олимпии Пекин-2008 паҳлавони дигари тоҷик Расул Боқиев ба гирифтани медали биринҷӣ мушарраф гардида буд.

 

Дар Бозиҳои тобистонаи олимпии Париж-2024 дар риштаи ҷудо варзишгари тоҷик Темур Раҳимов дар вазни + 100 кг медали биринҷӣ ба даст овард.

Дар сабқат барои медали биринҷӣ варзишгари тоҷик бар Анди Гранда аз Куба пирӯз шуд.

Темур дар даври аввал озод буд ва дар марҳилаи дуюм бар Эрик Абрамови олмонӣ ва дар даври сеюм бар Алишер Юсупови узбекистонӣ ғолиб омад.

Ӯ дар даври нимниҳоӣ аз Теди Ринери фаронсавӣ шикаст хӯрд.

 

Санаи 4-уми августи соли 2024 муштзани тоҷик Давлат Болтаев дар вазни то 92 кг дар даври нимниҳоии Бозиҳои тобистонаи олимпии Париж-2024 дар риштаи бокс шикаст хӯрд ва соҳиби медали биринҷӣ шуд.

Дар ин давр Давлат Болтаев муқобили варзишгари узбекистонӣ Лазизбек Муллоҷонов рақобат намуд.

Бояд тазаккур дод, ки муштзани тоҷик дар даври чорякниҳоӣ бар варзишгари ирландӣ Ҷек Марли бо ҳисоби 4:1 ғалаба намуд ва ба даври нимниҳоии Бозиҳои олимпӣ роҳ ёфт.

Ёдовар мешавем, муштзаноне, ки ба марҳилаи нимниҳоии Бозиҳои олимпии Париж-2024 баромаданд, аллакай ҷоизадори ин мусобиқа мебошанд, зеро дар сурати мағлуб шудан соҳиби медали биринҷӣ мегарданд.

Ҳоло дастаи олимпии Ҷумҳурии Тоҷикистон дар Бозиҳои олимпии Париж-2024 се медали биринҷӣ дорад. Ду медали биринҷии дигарро дар риштаи ҷудо Сомон Маҳмадбеков дар вазни то 81 кг ва Темур Раҳимов дар вазни + 100 кг ба даст оварданд.