31 марти соли 2025 6-умин вохӯрии ҳамоҳангсозии системаҳои алоқа, навигатсия ва назорат барои идоракунии ҳаракати ҳавоӣ (CNS/ATM)-и Ҷумҳурии Тоҷикистон ва Ҷумҳурии Мардумии Чин дар толори КВД “Тоҷикаэронавигатсия” баргузор гардид. Дар ҷаласаи мазкур муовини директори Агентии авиатсияи граждании назди Ҳукумати Ҷумҳурии Тоҷикистон Набизода Азиз, директори генералии КВД “Тоҷикаэронавигатсия” Лоиқ Бегиҷонзода, муовини маъмурияти Авиатсияи граждании Ҷумҳурии Мардумии Чин Ма Бинг, Сафири Фавқулода ва Мухтори Ҷумҳурии Мардумии Чин дар Ҷумҳурии Тоҷикистон Тсзи Шумин, ҳайати меҳмонони воломақоми авиатсияи граждании Ҷумҳурии Мардумии Чин, намояндани ширкати ҳавопаймоии “China Southern Ailines” ва мутахассисони КВД “Тоҷикаэронавигатсия”  ширкат варзиданд.

Дар раванди вохӯрӣ оид ба масири транзитӣ табдил додани долони нави мустақими ҳавоии миёни Ҷумҳурии Тоҷикистон ва Ҷумҳурии Мардумии Чин (POMIR-AGVUT) ва ҷалби ширкатҳои ҳавопаймоии дохилу хориҷ матраҳ гардид.

Ҳамзамон дар доираи сафари худ намояндагони воломақоми авиатсияи граждании Ҷумҳурии Мардумии Чин аз утоқҳои корӣ, манораи муназзимии КВД “Тоҷикаэронавигатсия” дидан намуда, бо фаъолияти таъмини хизматрасонии аэронавигатсионии корхона аз наздик шинос шуданд.

Зикр намудан ба маврид аст, ки роҳандозии ин иқдомҳо на танҳо барои Тоҷикистону Чин балки барои кишварҳои Осиё ва Аврупо имкониятҳои васеъро фароҳам меорад. Ҳамзамон, ифтитоҳи долони нави ҳавоӣ барои рушди иқтисод ва таҳкими шарикии стратегии ҳарду давлат ва кишварҳои минтақа хизмати арзанда хоҳад дошт.

 

                                                                        Маркази матбуоти КВД “Тоҷикаэронавигатсия”